Ofl... debuxando vacalouras: CONTRASTE I

sábado, 13 de noviembre de 2010

CONTRASTE I - CONTRASTE II

A continuación mostrarei dous cadros que estiveron na exposición de "Construíndo percepcións". Nestas dúas obras xoguei co contraste entre o Vigo rural e o Vigo urbano. Dous mundos distintos que conviven xuntos nesta cidade, entre as súas rúas cheas de edificios aínda podemos encontrar esa parte rural que alberga un sentido distinto á hora de pensar en veciños, un rural que achega en moitos casos ese verde natural que nos é tan necesario. Enchendo a cidade dunha vida non só a nivel de flora senón tamén de fauna, zonas que van liquidando para crear moles de edificios que tan sequera dan vendido. Tanto esforzo en construír edificios, tanto diñeiro, para que a metade do centro este con vivendas baleiras, para que moitos destes edificios non teñan dono ata saber cando.

Upss!!! Desvíome do tema. Nestas dúas obras quero mostrar estas contraposicións entre tonos fríos como mostra a cidade e os tonos cálidos que nos dá a parte rural. Ese contraste entre estar vixiados por cámaras de mil comercios, caixeiros, no porto... contrastada coa intimidade da propia vivenda. Veciños, en fin eses témolos en ámbolos dous campos e son os maiores vixiantes do barrio. Pero é máis doado establecer relación entre 20 casas ou nun barrio, que establece-lo nun edificio onde viven 64 persoas que non ollan máis alá do seu...

Estas obras simplemente pretenden mostrar ese contraste entre o urbano e rural, entre a frialdade e a calor, non é máis que unha interpretación dunha das moitas realidades que nos rodean día a día.